Dame mak forma unika ne'ebe ita sinti realmente umano
Kultura maka identidade ema grupo ida nebe moris hamutuk iha fatin ida. kultura bele halibur ema hanesan mesak familia deit tamba sira nia hakarak, kostume no arte moris. Ita bele moris hamutuk iha mundo ida deit maibe iha kultura oioin iha ita nia mundo ne'e. kultura labele fahe ema ka nasaun maibe hatudu mai ita nai maromak nia matenek atu fo ba humanidade kultura unika nasaun ida-idak nian.
ita nia kultura hatudu mai ita hotu katak ita ida-idak unika ba ema seluk maibe maromak hadomi ita hanesan. meski maromak hakiak ita ema ho ida-idak nia kultura maibe nia mos hamosu kultura maromak nian, ne'ebe lori rekonsiliasaun. Nai maromak hakarak halo rekonsiliasaun ho nia kriatura sira, ho nia emar sira liu husi nia oan mane jesus hamoris fali kultura domin nian liu husi nia hanorin, esplikasaun, servisu no nia hahalok. Nia hatudu mai ita kultura domin liu husi bainhira nia kura ema moras, fo han ema hamlaha, hakoak ema nebe kiik, no buka ema nebe lakon.
kultura domin ne'ebe jesus hakarak kuda iha ita nia fuan mak fo no perdua. ne'e mak kultura ne'ebe bele halibur hamutuk ema ho kultura oi-oin husi mundo tomak. kultura domin hatudu an momos liu husi rekonsiliasaun. domin maka atu fo perdua ba ema seluk. domin mak ita simu malu didiak nafatin.
domin mak doutrina jesus nian ho nia aman maromak iha lalehan nian.
domin mak kultura ema ida-idak tengki moris hodi hala'o iha nia moris lor-loron.
domin mak kultura ne'ebe la diskrimana ema, la falta respeita ba ema, la duni no la fahe ema seluk.
domin mak kultura lalehan nebe jesus lori rasik mai rai.
kultura domin mak tengki sai hanesan identidade ba ema hotu-hotu ne'ebe tuir jesus. jesus dehan : "imi hadomi malu ba, hanesan hau hadomi imi, nune'e mos imi tengki hadomi malu, hanesan ne'e ema hotu sei hatene katak imi hau nia alunos, bainhira imi hadomi malu".(joao 13,34-35).
domin mak forsa ida ne'ebe kesi hamutuk hela deit maromak nia kriatura tomak.
domin mak chave odamatan rekonsiliasaun ba maromak no nia criasaun.
domin mak kultura maromak nian ba mos nai maromak nia kriatura hotu-hotu.
moris tuir kultura domin atu bele halo rekonsiliasaun ho maromak no ita nia maun alin sira.
(Sr.Nernard Bondoc, JN Diario,12/4/2012)
No comments:
Post a Comment